梁冠聰賺無價親情

梁冠聰小時候已醉心足球，由丙組、乙組、甲組踢到現時超級聯賽，盡顯其領袖風範。2016年加入電視台擔任足球評述員，口才、急才令球迷眼前一亮。1年後這位和富大埔中場繼續「分身」，搖身一變成為有機菜檔「揸弗人」！「其實係因為當時爸爸做咗心臟手術，休養咗大半年，喺佢半退休情況下突然出現呢個機會，同屋企人商量後，決定同姑媽一齊經營有機菜檔，等爸爸有啲寄託。」於屯門區長大的「大佬」早已與這個街市結緣：「姑媽早喺10年前已經喺呢度經營紙紮舖，所以知道有機會可以喺同一個地方開舖，我哋即時接受呢個挑戰。」

兄弟落舖獲街坊支持

「我同細佬最勁係賣個樣！」梁冠聰與弟弟梁諾恆閒時到舖頭幫忙，都獲不少街坊支持，名副其實「唔打得都睇得」！「有啲客人初初見兩個後生仔企喺舖頭，都好奇怪點解有年輕人出現喺街市，就會走過嚟幫襯，買買吓變埋熟客！有時我哋唔喺度，佢哋會問姑媽兩個後生仔去咗邊！」做生意跟踢足球一樣，靠的是團隊合作。梁氏兄弟平日要練波，難抽身日日「巡視業務」，看舖重任落在家人身上：「開舖早期由爸爸同姑媽合力經營，我同細佬得閒就會幫手。到最近爸爸身體再出現小問題，就請咗個兼職女工幫姑媽手經營菜檔，而媽媽就負責紙紮舖。」

遇分歧最緊要有商量

每逢有梁氏兄弟的賽事，總會見到「聰爸」風雨不改入場支持。能同時兼顧檔口與入場睇波，「大佬」笑言爸爸開舖前已跟姑媽約法三章：「佢好醒目，應承做菜檔前提出唯一嘅要求，就係要睇我同『細佬』比賽！」在「大佬」Fb常見到他們一家溫馨生活照，「大佬」坦言一起做生意拉近家人關係：「開業差唔多1年，最大得着係同屋企人多咗話題，以往可能成日講足球，開舖之後多咗好多話題、見面同溝通機會。」很多人認為與家人一起做生意，最終只會出現電視劇情節裏的爭產下場，但「大佬」笑稱：「冇喎！意見分歧就一定有，不過一家人只要有商有量，點都會有共識。」

今個球季轉投和富大埔，重投李志堅「堅爸」懷抱，身為大師兄的「大佬」希望自己與舖頭一同進步：「新一年希望舖頭生意蒸蒸日上，為街坊提供更有質素嘅選擇；自己就繼續力求進步，喺球會站穩正選，有更佳及成熟嘅表現，繼而入選香港隊！」

圖：何彥霆／文：胡恩晴（部分相片由受訪者提供）