虎爸李志豪收火唔做「虎爸」
在「怪獸家長」當道的香港，要當一位嚴厲管教、望子成龍的「虎爸」並不容易！新球季轉投東方龍獅的「虎哥」李志豪，預計會在下周三（9月6日），名正言順榮升「虎爸」！不過，出道以來一向我行我素的「虎哥」，卻直言自從「虎媽」有喜後，自己的EQ「被鍛煉」到不再火爆，更加一反常態表明想走慈父路線，「虎爸」唔想做「虎爸」！
港隊明日會作客新加坡踢熱身賽，備戰下周二對馬來西亞的亞洲盃外圍賽，但大軍名單缺少了李志豪的名字。原來這位代表港隊次數最多的紀錄保持者，早已向「Kim Sir」申請「侍產假」，坐定定等待9月6日迎接寶貝女。
變住家好男人迎囡囡
自從太太Cymbie有喜後，「虎哥」便與中甲梅州客家解約回歸港超聯，並加盟東方龍獅，期望變身「住家好男人」照顧愛妻。雖然是新手Daddy，但「志豪」對自己信心十足︰「媽媽以前有幫人湊小朋友，我細個幫過手有經驗，早排亦上咗4堂學餵奶同換尿片，應該冇乜難度。」他透露婚前也有想過生小朋友，但太太有喜是「意料之外」︰「之前見到同期港隊隊友好似陳偉豪、張健峰都生晒BB，都有諗過幾時到我生番個一齊玩，咁啱得咁蹺，無啦啦有咗，但依家成家立室，時間都算啱啱好。」
這個「意外驚喜」亦令過去走型格路線的「虎哥」，給人煥然一新的感覺︰「依家有個女唔同晒，以前性格火爆，鍾意點就點，但依家照顧太太同個女，要顧全大局，唔可以咁衝動。」他又笑言自己EQ已改善不少︰「老婆佗B嘅時候脾氣大，發脾氣嗰陣要又忍又氹，所以EQ好咗好多。」
注重溝通唔Buy體罰
雖然有「虎哥」的外號，但李志豪就想做個慈父，拒絕做「虎爸」︰「我覺得自己會係溫柔斯文，同個女傾偈嗰種爸爸，一定唔會體罰佢。」李志豪還特意找風水師傅幫囡囡擇個吉日出世，並改名「芯語」，寓意囡囡衣食無憂，聰明伶俐，盡顯細心一面。不過作為「麻甩佬」的他，訪問途中就發短訊問老婆︰「阿女個名點寫？」難掩粗心一面。
談及家庭將來，年屆34歲的「虎哥」亦有為退役後的生活打算過︰「太太沒有給我壓力養家，叫我『想做咩就做』。稍後我準備考教練牌，也有可能做生意。」然而，曾經自稱是「足球天才」的他就不希望女兒將來繼承衣缽︰「唔鍾意女仔踢波，最好唔好掂咁多運動，畫畫練琴就得，斯文啲好。」
圖/文：司徒子文、蘇子雋
場地：Love By Mary J