寶娃奸招KO施蒙娜
經過15個月停賽期，俄羅斯網球天后舒拉寶娃尋日終於再次踏足大滿貫賽事，喺美國網球公開賽首圈鬥羅馬尼亞球手施蒙娜。以外卡身分參戰嘅「寶娃」，比賽中途以「廁所Break」嚟打斷施蒙娜後上氣勢，終以6比4、4比6及6比3贏波晉級，取得復出後首場大滿貫勝利。不過有網民指佢「借尿遁」贏得唔光彩，仲罵寶娃「一世都係騙子」。
排名跌到第146位嘅舒拉寶娃，尋日面對世界排名第2嘅施蒙娜，喺現場大部分球迷支持打氣下，寶娃以6比4先取1盤，不過去到第2盤，施蒙娜積極反撲，以6比4扳平盤數1比1。
去到第3盤開波前，寶娃突然同球證提出要去洗手間，拖足6分鐘後至出番嚟，結果施蒙娜「攤到凍晒」下，被舒拉寶娃再贏1盤6比3，結束呢場歷時2小時44分鐘嘅大戰。贏波後舒拉寶娃激動掩面跪地，更眼泛淚光向球迷派飛吻致謝，仲話︰「唔會再離開網球」。聽落雖然感人，但事後唔少網民鬧佢出奸招，話寶娃嘅6分鐘「廁所Break」先係致勝關鍵，甚至直言︰「一日騙子，一世都係騙子！」
自言係「機會主義者」
不過舒拉寶娃似乎唔太在意，賽後佢喺記者會上表示：「我嘅哲學係咁，如果你唔狂練後場，唔喺清晨、惡劣情況獨自練波，無可能喺大賽亮相。我係機會主義者，熱愛挑戰，呢個係我打波嘅動力。如果冇挑戰，你點會有推動力，點會從中啟發到自己？」
昨日焦點賽果
男單首圈
(8)泰桑加(法國) 3:0高派爾(羅馬尼亞)
(10)伊士拿(美國)3:1靴拔(法國)
佐敦湯臣(澳洲)3:2(10)索克(美國)
(23)沙華列夫(德國)3:2加維哥基斯(美國)
女單首圈
(3)麥古露莎(西班牙)2:0列真高(美國)
(5)禾絲妮雅琪(丹麥)2:0寶沙妮絲古(羅馬尼亞)
(9)V威廉絲(美國)2:1古絲莫娃(斯洛伐克)
(13)姬維杜娃(捷克)2:0珍高域(塞爾維亞)
舒拉寶娃(俄羅斯)2:1(2)施蒙娜(羅馬尼亞)
圈內數字為種子排名