何嘉麗畀料教大師弟
教育大學籃球隊成員引以為傲的「爛命精神」，在「Jordan Brand Invitational 2017」帶領球隊離開過往青黃不接困境，成功打入總決賽。這份精神更加是教大舊生、釜山亞運劍擊銅牌得主何嘉麗（Connie），以往代表香港南征北討、角逐各項經典大戰時的最佳形容詞！
以出色的劍擊技術及一把洗頭水廣告長髮聞名的何嘉麗，畢業於羅富國教育學院（即今日的教育大學），在學期間令她最難忘的，莫過於當年由各間師範學院舉辦的四師體操比賽：「大家在參加比賽前都會好齊心花好多時間準備，每日一落堂就會去練習。」正是這樣，何嘉麗謂每逢知道學校有比賽，都會盡量抽時間去為自己友打氣：「自己作為運動員，當然明白現場氣氛好緊要！所以每當班上有同學代表學校出去比賽，我哋成班同學都會一齊去打氣，令比賽選手唔覺得自己一個人孤軍作戰，有人支持自己，個心會好好多！」
曾擔任民政事務局項目經理（體育及康樂）的Connie指出，要為香港體壇出一分力，最重要是從小培訓：「如果可以令小朋友從小就有機會參加體育活動，佢哋長大後對體育興趣會更大，甚至想令運動成為自己的職業。」這正正就是Connie加入「教大」大家庭，希望擔任體育老師的其中一個原因。
「最緊要放開去打」
今屆「Jordan Brand Invitational 2017」總決賽，教大需面對球星如雲、有多名甲一球員坐鎮的理大！縱然強弱有分野，教大依然會憑其「爛命精神」作風、以永不放棄兼「爛打」來作賽。Connie十分認同這種精神：「雖然對方有唔少出名球員，但比賽都係睇臨場發揮、士氣等等，有好多因素影響結果。」她更說自己看過不少比賽都是強隊被弱隊的士氣擊敗，故今次教大男籃背負學校之名，Connie寄語一眾隊員要全力拚搏：「無論落後又好，領先又好，放開去打，逐分逐分咁攞都唔緊要！」
總決賽
理工大學vs教育大學
周日修頓開戰
JORDAN BRAND INVITATIONAL 2017
日期：9月3日
地點：修頓室內場
時間 賽事 對賽球隊
4:30pm 季軍戰 嶺南大學vs浸會大學
6:20pm 冠軍戰 理工大學vs教育大學
圖／文：司徒子文、蔡金伶