34歲保連奴有火再搏過
人生有幾多個十年？祖籍巴西的保連奴自2008年首次踏足香港，到現在已近十年。這位由最初對香港的認知只有「Jackie Chan（成龍）」的老外，到入籍做香港人；由在傑志成名獲「北上」機會，到因傷「坐多過踢」毅然回流……十年即將過去，又似回到起點，但對34歲的保連奴來說，這中間的難處，都可憑心中「那團火」去克服，決心再為傑志衝擊錦標！
回想2008年1月，年僅25歲的保連奴在上機前，對香港這個地方的認知幾乎是零︰「我嘅夢想係去巴西以外嘅地方落班，不過目的地係香港就從來冇諗過。其實當時我對香港同呢度嘅球會係一無所知，淨係知道呢度有個Jackie Chan！」
語言不通難過爭正選
初到香江，保連奴即在公民爭取到一席正選，靠的就是「那團火」︰「我嚟到香港第一個目標就係要令球會同我續約，因為當時我嘅合約只有5個月，所以我要盡最大努力去爭取、去搏命。喺5個月後，公民就贏得足總盃，而我亦得到一份2年嘅合約。」
離鄉別井從來不易，但一向堅強自信的保連奴就覺得這點「其實唔難」，真正的問題卻在球場以外︰「其實我喺巴西嘅時候，已經唔喺自己原本嘅城市踢波，所以離家生活唔係太困難。反而最大嘅挑戰係語言，因為喺巴西係講萄葡牙文，嚟到香港要我用完全唔識嘅廣東話同英文嚟溝通。不過過咗幾個月之後，都會開始主動同人打招呼，跟住情況變得愈嚟愈好。」除了足球，保連奴在香港更邂逅同為「異鄉人」的英國籍妻子，令他決定留在香港落地生根︰「我同太太認識咗有5年，而佢亦喺呢度居住超過10年，我哋依家計劃留喺香港組織家庭。」
目標「1個月內踢足90分鐘」
去季保連奴獲中甲球隊佳兆業垂青，成功「北上」發展，惟因傷患問題上陣次數寥寥可數，最終要解約重返傑志，換着別人或會因此一蹶不振，但保連奴卻只簡單一句「可惜」來形容。回到傑志，保連奴專心做復康操練，看他一身「爆肌」，就知這位34歲球員「那團火」仍未熄滅，對於新季展望，保連奴表示︰「首要目標當然係復出，再睇吓今年打成點啦！現時都開始重拾比賽狀態，希望喺1個月內可以踢足90分鐘，協助球隊爭標！」
保連奴小資料
中文名字︰福保羅
出生地︰巴西聖保羅州
身高︰1米80
位置︰前鋒
出生日期︰1983年1月16日
香港威水史︰
足總盃冠軍(2008、2015)
高級組銀牌冠軍(2011)
高級組銀牌神射手(2011)
超級聯賽冠軍(2015)
聯賽盃冠軍(2015)
圖/文：何彥霆（部分相片由受訪者提供）