傑志拍跳6蛋贈澳門 「坦克車」盧卡斯弗番食大四喜

澳門 0：6 傑志
盧卡斯（右）已操起狀態，對澳門獨取4球。（圖片由傑志提供）

早前完成南韓集訓返港的傑志，昨午渡濠江與將出戰亞洲盃外圍賽的澳門代表隊拍跳，新季人腳變動不多的傑志，今仗陣容和上季分別不大，後防由門將王振鵬把關，配合3名後衞防線，而前鋒線則由盧卡斯擔正，加上林恩許及林志堅攻堅。

保連奴傷愈後備上陣

極之渴望表現自己的盧卡斯，開賽11分鐘便在禁區內以後踭建功，為傑志大勝揭開序幕。該名巴西籍前鋒在完上半場前再入一球，令主隊落後0比2完半場。甫換邊再戰，後備入替的艾力士近射得手，之後盧卡斯再入2球，艾力士完場前「埋齋」成6比0完場。

賽後，「最佳教練」「朱Sir」表示球隊在許多方面都有進步，但在回防速度上仍有改進空間。至於後防主力艾里奧，則認為是役球隊發揮不俗，他說：「對手澳門隊踢法極之防守性，對我哋練習進攻，特別係撕破密集方面，係好有幫助。呢場我哋應教練嘅指示，做咗好多兩邊傳中，同走位去製做空位，效果應該唔錯，相信教練團會滿意。」是役從中甲回流的保連奴，亦有後備上陣，相信困擾他多時的傷患已痊愈。

完成對澳門的熱身賽後，傑志下周將再會安排熱身賽，對手有待公布。

保連奴（左）走出傷患，今仗更後備上陣。

雖然只係熱身賽，但傑志一樣有fans過大海打氣。