鄭少偉下半場繼續Dream Big！！
好波不如好運，這是「香港亨利」鄭少偉形容自己15年職業生涯歷程。從月薪1,500元的街場仔到幾乎每年捧盃的「福星」，亨利的15年足球旅途恍如見證香港足球起落，能夠經得起時間洗禮，又豈會只靠好運？「可能係生於最壞年代，我哋呢代人，仍然有團火！」人生上半場無憾落幕，自言硬頸任性的亨利已做好了撞板準備，將拒絕認命的星星之火繼續燃燒。
感恩招重文「執」入球圈
眼淺的亨利說好了不哭，未料訪問甫開始，眼淚再度決堤。出道於沙士亂世、1,500元月薪起步、曾遭嘲笑冷眼，本已是追夢勵志劇的必備黃金元素，但讓亨利「諗起都想喊」，還是緣於感恩的心︰「第一個一定要多謝喺元朗街場執我去球圈嘅招重文，以前細個漫無目標又一日，結果一步一步實現夢想，諗落我都算破格！」
回想15年前任職地盤散工也有月薪15,000元的不俗收入，卻在只得10分1人工待遇的交叉點上，落下賭注扭轉人生。南華從降班走到復興、傑志初建王朝盛世、東方回歸頂級聯賽再大搞，香港足球自千禧年以來的興衰起落，也刻着亨利的成長印記︰「當我宣布退役後，同齡嘅富仔（黃耀富）係咁WhatsApp唔畀我退。嗰時球圈環境好差，但係唔知點解又捱過咗，我哋呢代人，仲係有團火，慶幸係呢十幾年嚟有唔少『黐線』老闆願意投資。諗番起當初得幾十人入場，到退役前幾場比賽仲有二千幾人睇，已經係無憾。」
就在告別戰前對南華的一仗，亨利仍能力壓保贊推入禁區博得12碼，想起曾經連熱身也被取笑，亨利的「火」，仍躍躍欲試︰「頭一年半載都好怕熱身，驚手腳唔協調畀人笑我騎呢。嗰時諗住踢到25歲，入唔到香港隊就退休，邊會諗到踢到今日。」
面對質疑聲音，亨利總能以笑容應對，外人以為他吊兒郎當，實則甘苦自若︰「唔順心時候，落街跑個圈，鬥志又返番嚟，我成日記住『勿忘初衷』，當初揀踢波係為咗錢定係快樂？就算只有1分鐘上陣，點解唔去盡力利用呢1分鐘令人改觀？只要記住冇嘢做唔到，就可以創造無限可能。15年嚟同亨利合作過嘅隊友、教練同老闆都冇乜負評，算係我小小成就。」
心裏「有火」毋懼競爭
如何努力過，又要話你知？時間證明，好運不能用一世，面對未知下半場，亨利已做足準備︰「人生總係7分靠自己、3分靠運氣，做球員其實好幸運，好多事情都有人打理幫手，但係出到去其他圈子工作，我已預咗要由低做起。贊助商喺我掛靴前送咗對寫住『Dream Big』波砵畀我，意思係目標無限大。由畀人睇小到35歲掛靴前，我都唔怕去同人競爭，依家係時候，睇吓出面世界有幾大。」對於新工作，亨利保密工夫十足，但自言會離開球圈一段時間，在人生下半場繼續創造無限可能。
文：徐嘉嘉