難忘「黑暗期」人情味
鄭少偉的15年職業生涯效力過8間球會，幾乎年年有盃捧的背後，「亨利」自言全因硬頸性格使然。縱言每段回憶也珍貴難忘，效力南華降班的黑暗時期與人情味，仍是最令亨利甜苦交集。
南華降班羞愧唔敢出街
「我承認我係任性，好多班主其實係為我好，希望我轉型助教舖路，但我就係唔服氣，好想證明自己仲踢得，諗番起上嚟，我係問心有愧。」在亨利的感恩名單上，少不了歷年所有球會教練與老闆，但說到最愧對的，他又不禁哽咽︰「南華降班之後3個月，我羞愧到唔敢出街，特別係令到教練黃文偉要帶住一間有幾十年感情球會降班畀人鬧，當時我不斷提醒自己，唔可以再令對自己有期望嘅人失望。」
亨利效力南華4年期間，正是香港足球由低谷走向中興的轉捩點，縱然此後10年奪標無數，隨時代流逝的人情味，仍是無法代替︰「頭一、兩年喺南華人工仲係好低，嗰時燒味檔老闆每日都斬好晒燒肉、油雞畀我哋，諗番都唔好意思。可能當時環境難捱，大家比較少淨係諗自己，依家球圈整體待遇好咗，但人情味反而冇以前更重。」人物風景都改變，猶幸亨利的初衷，仍然未變。