九巴元朗Vs東方龍獅《東網》直播激戰

「瑞士豪度錶足總盃」8強再爆「同門少帥對決」,由「師弟」曾昭達率領的「奇兵」九巴元朗於深水埗運動場再鬥「師姐」陳婉婷掌舵的東方龍獅!雖然九巴元朗在港超遭東方龍獅「雙殺」,但「達Sir」揚言全隊矢志爭奪足總盃,戰意高昂誓要鬥到底!「牛丸」則強調足總盃乃會方力爭衞冕港超外一大目標,縱使球隊征戰連連,仍會全力「三殺」對手!

(東網on.cc周六下午2時30分直播)

達Sir要報「雙殺」之辱

同樣師承前足總技術總監陳曉明的「達Sir」和「牛丸」,今仗之前已兩度在港超聯碰頭,兩次都是由「牛丸」執教的東方龍獅獲勝。對於前兩次被「師姐」擊敗,「達Sir」指:「計實力同人腳東方龍獅都喺我哋之上,但兩次喺聯賽交手,我哋發揮唔算太差,吸收過兩次輸波經驗,我哋好有信心,只要做好啲防守及反擊,係有『偷雞』機會!」「達Sir」胸有成竹地道。

牛丸指傷疲增爭勝難度

由於狄卡奧「停賽」,加上要作針對性部署,九巴元朗是役肯定會變陣。「對方嘅勞高同基奧雲尼都係鋒線上危險人物,一定要有部署去將佢哋嘅威力減到最低,希望有效啦!」「達Sir」強調足總盃乃球隊季內唯一爭標希望,全隊上下將放手一搏,全力跟對手「死過」。

儘管季內交手領先2比0,但「牛丸」表明不會輕視對手:「就咁睇戰果,我哋一場贏2比1、一場贏2比0,但其實過程一啲都唔輕鬆,對手嘅防守好硬淨,反擊有效率,兩場呢6分得嚟不易。」除對手「有料到」外,「牛丸」球員在連場硬仗後,出現疲態及傷病困擾,亦提高了爭勝難度。「上場亞冠盃對水原藍翼後,傷兵多咗吳偉超同白鶴,前者肯定踢唔到,至於白鶴會等賽前先決定。另外徐德帥未好番晒,預計佢會喺之後聯賽對冠忠南區先復出。」