困廁所畀人「爆格」都搵佢！港超萬能保母乜都得

九巴元朗行政經理 周文健

處理本地球會行政工作的「幕後玩家」，向來講求資歷與經驗，只得28歲的周文健，不經不覺也在球圈歷練9年。「阿健」最初於足總處理教練培訓班的行政工作，到後來加入天水圍飛馬（太陽飛馬）及現在的九巴元朗，除要熟讀繁複合約與球例條款，手機更要24小時standby，為外援解決奇難雜症。

買人都掂！友情價斟雲迪奴域

阿健說：「試過有個韓國外援困喺廁所開唔到門，搵我救佢，又試過年初三有外援屋企畀人『爆格』，我等到警察掃完指模調查，已經係凌晨5點鐘。」難得阿健未有叫苦連天，反而從中啟發正能量。「呢份工作最大收穫係可以接觸唔同故事，以前太陽飛馬有位巴西外援所住樓層有人自殺，佢半夜打畀我一邊祈禱，一邊慨嘆點解香港人咁唔珍惜生命，然後同我分享佢喺祖家努力生存嘅故事。當每次做嘢覺得好灰時，諗起佢嘅正面價值觀，都會令我精神晒。」

法比奧（左）對呢位「保母」有讚冇彈。	九巴元朗今季表現咁醒，周文健功不可沒。	雲迪奴域（右）

阿健不諱言對外援球員較為「偏心」，畢竟人在異鄉，只要能夠幫得上忙，他亦樂意時刻效勞。「九巴元朗架構好簡單，我負責場外大小事務，球員自然會用表現知恩圖報。」曾被太陽飛馬棄用的雲迪奴域，失意期間幸得阿健伸出援手，去季中以「友情價」回港加盟九巴元朗，表現神勇吐烏氣。負責為九巴元朗斟介球員的阿健，為免「隔山買牛」風險，近季多轉而物色曾在香港落班的舊臉孔，他亦自爆曾經「交過學費」:「唔同聯賽有唔同合約條款，有東歐球會試過用業餘球員註冊職業聯賽，嚟到香港先發現該位外援唔能夠以失業球員身份註冊。這亦可解釋點解球會幕後工作比較少新人入行，因為每一個步驟都需要經驗累積，感恩嘅係我遇過嘅老闆，讓我可以喺撞板中成長。」

作為地區球隊，九巴元朗辦公室連同主席郭靜然只有4人，惟有一人多走一步互相配合。「細球會有細嘅好處，我反而有更多機會接觸唔同範疇新事物。當年我踢波唔叻轉玩攀山，就係希望挑戰新高度。」還在埋怨是誰發明返工？只要有目標，其實也可很快樂。