自認虎媽 揸風帆變揸軚盤
賽畢04年雅典奧運後，珊珊於05年誕下大女晞皚，正式由「風之后」變身為「風之媽」，2年後再誕下二女嘉怡，兩個囡囡自出世至今，不論起居飲食，返學放學，溫書娛樂，都是由這位全職媽媽「一腳踢」，運動員時代對自己要求120分的「風之后」，坦言對愛女都要求甚高，更直認「我是虎媽」！
「如果你問我係咪虎媽，可以話係，因為我對兩個女要求好高，主要係品格方面，我唔鍾意小朋友無禮貌，唔尊敬長輩，呢方面我好嚴，我係有要求，我唔知呢啲係咪虎媽；我係咪怪獸家長？你可以話我係！我要佢哋去認真做一樣嘢，讀書考試要有充足的準備，因為我做運動員時知道，準備充足是非常重要，只是準備好，付出了最大努力，成果並不重要，所以我不會問他們成果，但事前功夫就要做好。」
不問成果只求認真
對囡囡有要求，對自己當母親同樣有要求，兩個囡囡一個10歲，一個8歲，性格不同，一個愛靜一個愛動，但珊珊坦言仍然在挑戰之中：「我都要增值，阿囡學樂器，我都要識下「豆豉」（音符），有時亦要跟他們做Project做實驗，自己都要上網搵資料，依家大女開始進入青春期，管教上又要稍為改變，所以天天都在挑戰。」
珊珊每天6點幾起床，送囡囡返學，稍有兩三粒鐘的私人時間，中午開始又要準備去接囡囡放學，放學後更忙，參加課外活動、回家做家課、備課、溫習，這位「風之媽」笑言現在揸軚盤多過揸風帆：「我現職係司機，係專線小巴司機，哈哈！」不過，母親節將至，她知道兩個囡囡已經秘密地製作小禮物，準備給她驚喜，已經「甜到漏」！