珊珊寄語後輩：逆風而上

距離今屆里約熱內盧奧運會不足100日，難得相約96年一夜成名的「風之后」李麗珊，帶同當年的奧運金牌，重遊昔日訓練的赤柱基地，儘管珊珊與其帆板「HKG1」已退役10年，但基地的工作人員、赤柱街坊對她亳不陌生。「我好多時都會嚟赤柱，帶阿囡嚟玩下，呢度又係我老公娘家，但坦白講心態唔同咗，依家係enjoy。」這位香港體壇icon邊說邊打開密封了20年的奧運金牌，那金牌在陽光反射下依然閃耀，原來這面奧運金牌一直放在保險箱，最近適逢「奪金20周年」才難得「出籠」。問到珊珊再次拿起這面奧運金牌，感覺有否不同，她細望一下手上的金牌：「無變到吖！我諗裏面既精神都無變，（平時會拿出來睇下嗎？）無喎。我個人好得意，覺得完成任務，喺我嘅意義就係當時證明我係做得到，終於攞到呢個牌。」

唔覺得香港體壇有問題

精神？！所講的是否就是社會目前很需要的「香港精神」，「我諗呢面金牌會令人諗起一樣嘢，『香港係可以創造奇迹，香港人係可以做得到』，呢樣嘢唔係講20年，無論100年，1000年都係一樣，我諗呢個精神係唔會變，永世不變。」

香港回歸以來經歷了4屆奧運，很多人都質疑「下一個金牌會係幾時」？這是香港體壇出現了問題嗎？是運動員退步還是資源不足？三屆世界冠軍、曾高踞世界第一多年的珊珊理直氣壯地搶答：「我唔覺得香港體壇有問題，你可能會睇仲未有金牌，但數番呢幾屆我哋有銀牌有銅牌，唔可以否定佢哋嘅努力，坦白講唔係話肯畀錢就會有結果，否則奧運就係鬥錢，唔係鬥實力、鬥技術，培訓一個運動員要有國際水平，到奧運攞牌，係要時間同好多嘢配合，天時地利人和。」

講到現今的香港體壇，即使「風之后」已退役10年，但仍然對一班後輩相當關注，講起來亦很雀躍：「最近叫家朗既，都相當威風……哈哈！我唔擔心，今屆好有機會，我覺得會係香港爭取最好成績的一次，以往聽落去都係一兩個項目有機爭牌，但近年真係唔同了，單車、羽毛球、乒乓球、劍擊……唔係無機會。」當年一句「香港運動員唔係垃圾」現在仍然啱用，她再強調：「（運動員）唔係垃圾，一啲都唔垃圾，早排羽毛球乒乓球打倒世界第一，劍擊又攞亞洲冠軍，呢啲就係證明香港培訓出來的運動員或香港人，係可以做得到。」

珍惜幸福先可以更光更亮

「堅守信念 逆風而上」是李麗珊再送給香港運動員的錦囊、作為她奪金20周年的小小心意，她解釋好多人不太喜歡「逆」字，但在風帆來說「逆風」就是把握機會的好時機，她籲年輕一代「逆風」不是問題，害怕「逆風」才是失敗的癥結；同時，她希望體壇新一代能夠珍惜現有的幸福，並且要「吃得苦」，珊珊想當年：「以前我哋為咗慳錢爭取更多時間出外訓練，自己造帆、捱麵面包、瞓街、紮營都試過，現今運動員已有器材、有設備、有教練安排，真正吃苦不多，好多嘢已經覺得係必然，如果能夠更珍惜呢啲「幸福」，將可以更光更亮。」老套一句「吃得苦中苦，方為人上人！」這是珊珊的寄語！

文：李芷韻

圖：袁志豪