南華「打老虎」強襲福建
為爭取成為甲一常規賽冠軍盟主，南華今晚在灣仔修頓室內場硬撼福建，實行當正對手係「老虎咁打」，絕不留手！至於打頭陣則由另一爭標分子東方火併飛鷹，前者養精蓄銳再上戰場，今仗強勢獵鷹冇留手。兩場好波今晚7時起展開，票價為50元及長者學生優惠票30元，球迷要睇好波就要買定飛喇！
由於下星期二要硬撼爭標勁敵東方，南華助教李嘉耀揚言會把握練兵機會，今晚夜戰福建實行寓賽於操：「福建跟東方一樣，都是打法上偏重外投的球隊，所以今場對福建正好有機會讓我們嘗試加強外線防守，全力將對手得分能力減到最低。」同時由於南華上仗成功操起陳翊麟及林凱光，兩位射手着晒火，所以今次就算南華變陣玩輪換，仍然幾枝箭齊發，當正福建係老虎咁打，「大隻耀」坦言南華絕不輕敵，決心為未來賽事做足準備。
頭場東方抖夠鬥飛鷹
東方男籃經過半個月休息後，今晚再上戰場對飛鷹，抖夠出戰贏面十足，不過副總監李偉倫直言餘下魔鬼賽程唔易啃：「下星期要打南華及南青兩場硬仗，所以球員上陣及休息時間都要分配恰當，因此今場會給更多球員上陣機會，畢竟目前確保前四入季後賽最重要。」