林書豪：我仲係單身

望另一半非貪錢女

等到頸都長，ＮＢＡ球星林書豪時隔近3年再度訪港，昨早約11時從成都殺到，繼續展開亞洲之行宣傳活動。出名是虔誠基督徒的J.Lin，自從在ＮＢＡ「彈起」後風靡萬千女球迷，然而「林瘋」昨晚受訪時卻尷尬地自爆仍然單身，貫徹其怕醜仔作風。

被問到有何擇偶條件，林書豪稱：「作為一個基督教徒，我希望另一半唔係追求金錢、名譽同權力，並且同我要有相近理念及價值觀，要清楚我嘅為人，例如明白我點解要成立基金會。」簡單講句，林書豪要個好女仔，條件夠簡單，想做「瘋嫂」似乎絕非天方夜譚喎！

附近新沙士驚魂嚇親

林書豪今次訪港，下榻位於九龍的Ritz Carlton酒店，坐落於九龍站上蓋，該站醫務所昨早爆發「新沙士」虛驚，被問到J.Lin有否擔心「中招」，林書豪即時「面都青埋」地說：「你唔講我真係唔知，多謝你話我知，我而家有啲不安。」昨日於adidas運動基地輕舒腳頭的J.Lin，自爆小時後立心成為職業足球員，更幻想可以出戰世界盃，但及後覺得籃球才是自己杯茶，笑言「變心」皆因籃球得分比足球更多。

上次訪港時到尖沙咀食鐵板料理「慶生」的J.Lin，坦言食過翻尋味，但最想食點心，「林瘋」深明食點心「太Heavy」，但依然希望訪港能「試一舊」一嘗心願。林書豪今日行程緊密，晨早會自由活動，之後再到中環海濱活動空間，在adidas運動基地與甲一球員交手，下午則到中大主持「成功的再思」分享會，之後就前往台灣。林書豪父母及細路全程跟到實撐「林瘋」，全家人表現Nice到爆。想搵林家Selfie？今日最後機會啦！