蘇樺偉要成後輩榜樣

18年前，還是小伙子的蘇樺偉與「師兄」陳成忠、趙國鵬及張耀祥參加傷殘人士奧運會，勇奪人生第一面奧運金牌，3位隊友於2006年相繼退役，但「偉仔」繼續馳騁賽場未有停步。「金牌四子」多年後聚首一堂，帶領其餘16位殘疾運動員，一同角逐本屆渣打馬拉松賽的10公里賽事，義不容辭為香港殘奧會籌募經費，令年輕一輩運動員得到更多出外比賽的機會。4位短跑好手轉戰長跑，陳成忠直言備戰工作有極大分別：「訓練方面同以前好唔同，我哋以前跑慣平路，但因為今次比賽路線嘅關係，我們要多練習斜路，仲有跑圈練氣。」

目標一小時內完成

至今仍持續參賽的蘇樺偉今次嘗試長跑，還帶領後輩一同參賽，他期望自己可以成為榜樣：「我哋希望可以1個鐘頭內完成賽事，大家盡力而為吧！再加上我想趁今次機會，讓年輕成員知道我哋平時賽前係點樣準備。」除蘇樺偉外，張耀祥於退役後亦未有離開運動界，近兩年都有跑10K賽事，讓自己重拾比賽感覺。

一起跑過的日子 四子當年合作無間，贏盡不少大賽獎項。	三位師兄相繼淡出後，蘇樺偉仍是殘奧隊中的主力。	一眾跑手已為明日的賽事做好準備。

這次籌款活動由現於香港殘奧會工作的蘇樺偉負責。眼見昔日「小戰友」經已獨當一面，陳成忠不禁想起往事：「我記得『偉仔』第一次出外同我喺酒店同房，佢好頑皮！為咗唔畀我睇電視，沖涼嗰陣竟然收埋電視遙控器，真係畀佢激到嘔血！依家佢已經成熟同進步咗好多，仲可以照顧其他人，表達能力亦有提升，我哋都好開心。」難得「金牌四子」再次聚頭為籌款跑步，大家記得「齊撐殘奧精英」喇！

渣打馬拉松資料

日期：2014年2月16日

全馬及半馬起步：尖沙咀

10公里起步：東區走廊

終點：維園

參賽人數：73,201人

總獎金：30萬美元

圖/文：Riddle