加納特反轉史丹福橋
【本報綜合報道】籃網同鷹隊將於明晨在倫敦上演海外常規賽，眾所周知籃網明星球員加納特（Kevin Garnett）係車路士死忠fans，這位大前鋒昨日踩場反轉「藍戰士」主場史丹福橋球場，大送波衫之餘更乘機坐上車仔主帥「寸王」莫連奴後備席的「私家位」，高興到好似成個細路一樣！
37歲的加納特今次到訪史丹福橋，獲車路士前鋒舒賀爾尼及丹巴巴亞做嚮導，參觀球場之餘仲有機會捧起歐聯冠軍獎盃。加納特之後更坐上莫帥的「私家位」拍照過下主帥癮，其後興奮地表示：「我依家好似走咗入糖果舖嘅小朋友一樣咁開心！」加納特其後亦禮尚往來，送出印有舒賀爾尼及丹巴巴亞名字的籃網波衫給兩位「導遊」，車路士則回贈印有籃網及鷹隊球員名字的藍色戰衣。
奧巴馬接見賀熱火衞冕
唔講唔知原來舒賀爾尼一向都有追開NBA，他見到加納特後表示：「佢真係高到你唔信，見到佢嚟到史丹福橋玩得咁高興，搞到我都好興奮。」加納特與兩人合照後，舒賀爾尼及丹巴巴亞即急不及待將照片上載社交網站，一同與fans分享。另外，美國總統奧巴馬昨日於白宮接見熱火大軍，祝賀他們上季蟬聯ＮＢＡ總冠軍。
