丁俊暉晉唔到級賴地硬？丁俊暉於大師賽首場對梅菲嘅賽事，未開波先遇到停電，打打吓又突然跌Watt，領先4比2之後突然崩盤，出現多次大意失誤，第八局就有六次低級錯誤，最終連輸四局被梅菲逆轉，賽後小丁發晒脾氣，話唔鍾意呢個場，話以前喺溫布萊打好地地，自從搬咗去亞歷山德拉宮之後就未贏過，梅菲晉級之後會對香港天王傅家俊。
（now 637周四晚9時直播）
大師賽多年來都於溫布萊舉行，自2012年就轉喺亞歷山德拉宮舉辦，丁俊暉喺呢度未贏過波，估唔到今年大師賽第一場賽事，小丁一樣唔多順，未開波個場突然停電，小丁要呆等75分鐘先開波，佢亦喺微博發牢騷。
雖然現場觀眾一齊開手機，好似睇演唱會咁有氣氛，連現場攝影師都攞住結他自彈自唱，但似乎EQ一向唔高的小丁心情已經受到影響。對梅菲打至領先4比2之後失準，連輸四局，未能促成中國打吡。賽後丁俊暉躁躁地：「我唔鍾意呢度，我曾經喺溫布萊贏過冠軍，但自從搬嚟亞歷山德拉宮我再未贏過。」相反梅菲就用停電開玩笑寸番小丁：「我唔知贏波係唔係停電帶畀我好運呢？又唔係世界末日，咪好似網球落雨推遲一樣啫。」
梅菲八強會對傅家俊，呢名上周打出一桿147嘅球手話自己今個賽季輸過畀Marco，認為Marco較熱門，未開波就用口水戰畀壓力傅家俊，果然係老江湖。另外，「火箭」奧蘇里雲Hea打仍贏對手九條街，以6比1話畀對手米健士知道，何謂世界冠軍級實力，賽後「火箭」仲好招積咁話：「去年尾我比賽太多，見到張波枱都覺得厭悶，好彩放完個假之後先至有番啲動力。」