馬刺愚人節玩多鋪
熱火馬刺明早爆發聯盟一哥大戰！去年馬刺主帥普波維治（Gregg Popovich）派副選球員上陣鬥熱火鬧得滿城風雨，「輪休門」事件更遭球迷告上法庭，雖然起訴已經在昨晨獲得撤銷，不過普波維治依然「唔識死」，預告聽朝對熱火嘅「冠軍前哨戰」收起真路比利（Manu Ginobili），莫非密謀在愚人節再玩聯盟同球迷一鋪？
馬刺教練普波維治向來天不怕地不怕，去年11月尾就因不滿聯盟賽程安排，趁全美直播熱火對馬刺嘅大戰收起三巨頭，連累球會被聯盟罰款25萬美元（約194萬港元），更被一位律師入稟控告欺詐。據《今日美國》昨晨報道，雖然該位叫麥古尼斯嘅律師已撤銷起訴，但普波維治仍然「見過鬼唔怕黑」，決定繼續「玩嘢」！
鄧肯破「艇」 熱火炒「蜂」
呢支西岸榜首球隊昨日靠鄧肯（Tim Duncan）絕殺得手，主場以104比102險勝快艇。普波維治賽後稱真路比利腿筋有傷，肯定唔會喺明早鬥熱火披甲。鑑於馬刺未來10日內要硬撼灰熊、雷霆及金塊，美媒自然揣測普波維治極可能又因對賽程安排不滿，決定趁愚人節「玩嘢」抗議。
反觀熱火就鬥志十足，雖然27連勝日前斷纜，但昨日又輕鬆以108比89大炒主隊黃蜂，提前10輪常規賽鎖定東岸冠軍，加上首循環對馬刺嘅副選兵僅贏5分，明早為面子兼做聯盟「一哥」爭取季後賽主場優勢必拚，作客馬刺受讓1.5分捧下盤。
（廣東體育周一早上7時直播）
熱火下半季勢不可擋，同屬東岸嘅塞爾特人為免次輪季後賽就硬撼該支衞冕隊伍，盛傳餘下賽事會「勒住打」，寧願穩守第6、7位亦不願意爭第4、5位，難怪教練李華士（Doc Rivers）近日已收起主將加納特（Kevin Garnett），明日預料會任由主場出擊嘅紐約人魚肉，紐約人讓6.5分捧上盤。
（now 678周一早上7時30分直播）