紐約人負公牛醜態百出
病壞佗衰家！紐約人2年級生森柏特雖然正在養傷未能上陣搏殺，但這段期間都一樣新聞多多，而且仲有負面東西出現。森柏特於球隊大戰公牛前夕仍大搞派對，真係非常出位。不過，爛玩嘅代價就連累一眾殘爆隊友作客以85比93不敵公牛，全場打到好似趕收工一樣！
夜店狂歡踩到5am
紐約人上周五以20分大炒熱火後，一眾球員於邁阿密夜店慶祝勝利，費頓、贊特拿、JR史密夫及盧雲克等球員齊齊出席活動，贏波慶祝其實並非壞事，不過開一場派對班球員又點會「夠喉」呢？於是，紐約人趁昨日作客公牛前再來多次派對活動，這個活動的搞手正是自去季就因膝傷而打柴的森柏特。
森柏特這位於芝加哥長大的後衞，趁紐約人造訪公牛前一晚「盡地主之誼」於當地夜店Enclave舉行Party，大夥兒飲到翌日清晨5點幾天光至散場，非常盡興。森柏特近期大把動作，更曾親自唱作《紐約人Rap歌》，而他預計明年1月可以復操。
無心戀戰趕收工
紐約人一眾球員蒲完天光後昨仗對公牛表現果然走晒樣，更有隨隊記者目擊前鋒盧雲克及中鋒卻特湯馬士於賽前狂打「呵欠」，球隊於安東尼缺陣下僅得3人得分達到雙位數，於完場前落後6分時更連犯規戰術都懶得用，球隊最終以8分之差落敗，同時宣告5連勝走勢斷纜，成班球員趕收工趕到「出晒面」。
本報綜合報道