經典港產片《風塵三俠》講述3個同居男對感情態度各有不一，咁啱有3個NBA人物同佢哋似到十足十，包括同「大頭文」一樣唔肯結婚嘅「大帝」勒邦占士；瘋狂偷食而令前妻忍無可忍提出離婚嘅「大情人」米高佐敦；最後就係相貌戇直畀女飛，似十足「毛周朱」嘅堪富利斯。3位球星近日都有「好消息」公布，齊齊喺大除夕攞番個尾彩！
12月30日係「大帝」勒邦占士27歲牛一大日子，已經幫佢誕下兩名「王子」嘅女友莎雲娜繼續搏盡氹愛郎，除了在Twitter留言祝至愛生日快樂外，更「僭建」大騎樓隆胸送占士，似乎佢都知道大帝係「好波之士」喎！
據八卦網站《MediaTakeOut》透露，上圍唔算豐滿嘅莎雲娜早前出親街都包得密密實實，就連同友人曬太陽，都要笠住件有帽衞衣，唔講真係以為佢生嘢！但據知莎雲娜咁做，只係因為佢做完隆胸手術處於康復期，所以咪包實晒費事爆傷口嚇親人囉。有圖有真相，近期莎雲娜出席活動時，其兩枚「人造導彈」呼之欲出，占士哥實Like啦！
籃網大茄堪富利斯因為同視星Kim Kardashian結婚後極速「閃分」而成為大眾笑柄，正所謂女人事小、面子事大，堪富利斯已部署一連串復仇計劃，首個行動係溝前妻Kim死敵索模Dollicia Bryan，務求聯手對付「負心Kim」。
Dollicia之所以係Kim頭號死敵，因為後者早前與NFL球星列治布殊拍拖時，曾被Dollicia介入爭仔，所以Kim一直對佢懷恨在心。堪富利斯深明若與Dollicia一齊嘅話，除可激一激Kim之外，兩人又能夠槍口一致對外，加上Dollicia身材絕不比Kim輸蝕，所以都係撫平傷口良藥嚟嘅。
曾創下運動員支付贍養費最高紀錄1.68億美元嘅「波神」米高佐敦，似乎見過鬼都仲未怕黑，昨日獲得其發言人證實，已經與後生16年嘅伊維狄訂婚，遲吓再做老襯！
「波神」近年可謂戀愛大過天，多次在公開場合與古巴名模伊維狄高調亮相，09年又在邁阿密購入5000呎豪宅共築愛巢，所以早前曾多次傳出兩人訂婚消息。據知兩人今次係過聖誕節假期時，受浪漫氣氛影響而決定訂婚。無獨有偶，「波神」06年宣布離婚時，都係喺聖誕假期之後。不過波神咁花心，斷估佢今次都會先簽婚前協議，確保第日如果再離婚，荷包都冇咁傷嘛！