夏然然攻陷宅男防線

球愛敢死隊出動!體育版「優質雄性動物」接受號召,組成一支史無前例兵團,走訪娛樂圈及各界靚女,講吓佢哋對波的感受,當中有愛情、奇情、癡情……乜情都有,務求要你讀完之後愛到死為止!

夏然然(Cassie)正式投身模特兒界,呢個許穎(Phoebe)小師妹憑住嬌滴滴身形以及甜美樣子,正面衝擊香港宅男最後防線。大家咪以為佢細細粒會蝕底,其實呢招先係Cassie嘅最強殺着,查實好多港男嘅潛意識都有保護女孩子嘅DNA,而靚女Cassie就能滿足到男士嘅心理需要。佢仲話有好多「大件頭」嘅朋友都搵唔到好男友,所以對佢相當傾慕,睇嚟童顏Cassie魅力非凡,各位男士,你準備好接招未?

咪睇Cassie細細粒,一定好怕醜唔多出聲,其實佢係好動樂天派,玩遊戲時好投入,仲同工作人員打成一片。雖然攝影師經常要求Cassie擺出高難度甫士,但幾難嘅動作都難唔到佢,而且仲長期保持笑容添,專業態度可見一斑,真係忍唔住要畀個like佢。

Cassie話無論模特兒定係足球員,當中都會遇到好多困難,所以要成功就唔可以怕辛苦,亦要勇於嘗試唔同類型嘅挑戰。而Cassie話足球員比起模特兒更辛苦,除咗要控制飲食,以免身形走樣兼影響體能之外,面對各大媒體嘅尖銳問題亦要保持頭腦冷靜,回答時又要有禮貌,真係EQ低啲都唔掂。

欣賞碧咸顧家好男人

講到足球員,Cassie話由細到大最欣賞嘅都係碧咸,經常follow住「萬人迷」嘅最新動態。Cassie大讚碧咸好波又靚仔,而且經常畀記者影到佢同啲囝囝四圍玩,絕對係一個顧家好男人。問到碧咸會唔會係Cassie嘅擇偶指標?佢竟然Say No,話呢個銀河系唔會有第二個碧咸,所以佢會將擇偶條件相應調低喎!各位男士聽到啦,你仲有機會!

我哋都問過Cassie平時點樣keep fit,佢話最鍾意都係游水。呢類帶氧運動對燒脂非常有效,而且受傷風險度較低,特別適合女士參與。至於足球運動,Cassie就話以前較少接觸,但自從嚟過「球愛敢死隊」之後,發覺足球真係好好玩,如果有機會一定會再上嚟,接受名家嘅文武大挑戰。

圖:司徒子文