雷霆劫金信心爆棚

金塊無星勝有星

杜蘭特4月狀態大勇，平均每場取得26.8分，助雷霆取得7連勝及西北區第1名，而佢本人今季亦以27.7分成為常規賽得分王，係NBA史上最年輕嘅得分王2連霸，氣勢可謂一時無兩。不過，「平民球隊」金塊教練卡爾卻認為一支球隊擁有出色嘅整體合作，較有一位超級球星在陣更加實際。

卡爾表示：「你問每一位教練，都寧願擁有一支合作無間嘅球隊，好過擁有一位超級巨星，金塊球員勝在無私，每人都有得分能力，令對手防不勝防，我認為雷霆現時嘅態度有啲問題，你知道佢哋比賽後講過些甚麼嗎？我唔想喺公眾場合交代，但我哋心知肚明。」

杜蘭特唔覺自大

金塊後衞費頓亦火上加油：「佢哋成日喺比賽中挑釁對手，我一早就想喺季後賽同佢哋砌過。」杜蘭特卻作出還擊：「依家喺NBA打波唔可以扮君子，我唔覺得我哋自大，我為球隊嘅表現感到驕傲！」自信同自大只係一線之差，就睇吓金塊同雷霆邊隊可以喺首回合突圍而出！」

本報綜合報道