波總順利通過修章，「鳳凰計劃」終於可以落實執行，但係本地波密密打，今季升降班球隊已經定晒，到底下季有乜新搞作？聯賽維持十隊定係增加到十二隊，即使波總唔正式公布，都應該有個內部指引，令甲組會有個譜，開始組軍吖。
早前波男同大埔嘅陳平傾開，今季大埔區議會有幾十萬打底費，搵到嘅贊助夾夾埋埋有五百粒，又請到足球大使Lulu入場打氣，每次主場都咁熱鬧，球隊成績亦唔差，但係埋單計數，大埔全季支出總共使咗六百粒，距離收支平衡嘅目標，仲係好遙遠。
大埔係地區球隊，主場比賽氣氛一流，佢哋嘅票房喺港甲排三、四名，但實情係蝕到入肉。原來為配合「鳳凰計劃」，港甲未來要升格成為「港超聯賽」，大埔今季以公司模式營運，將贊助、門票等收入，加埋出糧、場租、獎金等支出列晒出嚟，成盤數嘅結果係「滿江紅」。
雖然大埔每次主場都有五百至過千人捧場，但其實都係打一場蝕一場，只係比起其他球隊冇蝕得咁緊要，不過每場一萬幾千「贖身費」就少不免，球隊主要收入來源仍然係贊助商同熱心人士，冇佢哋撐住，球隊都搞唔到。
波男覺得大埔夠晒條件打「港超聯賽」有凸，但都係要艱苦經營，睇嚟波總透過「鳳凰計劃」，真係要諗條好橋幫吓甲組會先得。
波男