同日另外3場季後賽，以湖人主場對黃蜂最無懸念，因為湖人淨係內線都贏晒，黃蜂根本冇人可守得住湖人兩名中鋒加素同拜林，今季常規賽兩隊4次交手，湖人全勝之餘且每場都得分過百，睇嚟首回合可先拔頭籌。
至於馬刺主場對灰熊，雖然馬刺牌面較高，但對手唔係任人宰割嘅魚腩，馬刺主將鄧肯透露，自己嘅腳傷未好番，今仗要帶傷上陣，而得分主力真路比利手肘扭傷亦上陣成疑，增加咗「巨人殺手」灰熊爆冷嘅機會。
東岸塞爾特人主場對紐約人，「綠軍」合作純熟，連《紐約時報》都認為佢哋只需5場就可解決對手，但紐約人主將史杜迪米亞表示，紐約人目標係打入總決賽，因為佢同安東尼、比立斯合共打過236場季後賽，經驗同樣豐富。