大帝三雙都要敗走家鄉

騎士今季失去領袖勒邦占士，成績一落千丈，由上季常規賽冠軍，淪為今季常規賽包尾大幡，難怪騎士對「大帝」恨之入骨。雖然今次已係占士加盟熱火後第二次返回克利夫蘭，但騎士迷怨氣未減，每逢占士觸球都噓聲如雷，令「大帝」甚為冇癮。

球迷噓足占士全場

由於騎士今季三對熱火全敗，為免遭逢叛徒橫掃，球員均激出小宇宙，第四節兩軍一度戰至平手，但騎士憑安東尼柏加及荷連斯在關鍵時刻連番得分，打出一段12比0攻勢將比分拋開。因為時間已所剩無幾，熱火最終返魂乏術爆大冷以12分不敵騎士，5連勝走勢被終止。

騎士球迷舉牌譏諷「大帝」。（美聯社圖片）

「大帝」（右）同騎士嘅巴朗戴維斯鬥法。（美聯社圖片）

上場對火箭均交出「30+10」恐怖數據嘅「三巨頭」，今場只得占士一個表現達標，貢獻「三雙」27分、12次助攻及10個籃板，而老將碧比則射入7個三分球貢獻23分。騎士方面，表現最佳係攻入「雙雙」21分及12個籃板嘅大前鋒希臣，而安東尼柏加就有20分進帳，當中三分球4射4中。

全場被噓嘅占士賽後盛讚騎士打出超水準，值得贏波，同時亦對球隊防守鬆散略有微言，認為熱火必須加強集中力防守。至於騎士後衞吉遜就話，球迷對球隊不離不棄，成為今場贏波關鍵，球迷吶喊聲往往係球員嘅最大動力。