安東尼三分雨冧粉絲
一直唔肯續約而惹怒金塊迷嘅「甜瓜」安東尼，尋日續以表現贏掌聲，佢面對溜馬單節射入6球三分波，刷新其職業生涯紀錄，全場轟入36分，率領金塊以121比107大勝溜馬，難怪主場球迷都唔再噓佢。
自從安東尼決定唔續約金塊，並且捲入多宗交易傳聞後，「甜瓜」在金塊球迷眼中已由英雄變成叛徒，每次主場出賽都被球迷噓爆，就連効力湖人嘅高比拜仁早前都睇唔過眼，叫金塊迷放過安東尼。不過噓聲反而成為安東尼近期動力，尋日佢在第三節上演個人騷，單節射入6球三分波，助球隊拉開分數，最終大勝14分完場。
單節轟6球三分波
「甜瓜」在單節內投入6球三分波，刷新其職業生涯紀錄，至於聯盟中單節內射入最多三分波次數，則由公鹿嘅米高列特保持，○二年單節入7球。《丹佛郵報》記者賽後亦表示，經過安東尼第三節嘅神勇表現後，主場球迷已停止噓「甜瓜」，更用熱烈掌聲支持呢位「昔日英雄」。
過檔紐約人幾成定局
不過，據一位唔願意透露姓名嘅圈內人爆料，安東尼過檔紐約人已幾成定局，「甜瓜」好大可能在二月廿五日交易截止日前，先於金塊續約一份三年價值6,400萬美元合約，然後再以先簽後換交易至紐約人，因為金塊已深明「甜瓜」只願過檔紐約人。當然，安東尼亦有可能選擇在季尾以自由身離隊，但到時就有一定風險，皆因紐約人未必會為「甜瓜」提供頂薪合約。
本報綜合報道