阿裕上星期教完波之後，就同班學生坐低傾下「NBA經」，殊不知原來香港地都有唔少小牛迷，好多學生都希望小牛能夠一嘗總冠軍滋味！雖然阿裕都唔想潑佢哋冷水，但小牛想以呢個班底奪得總冠軍，確有一定難度。
小牛在較早前有主將魯域斯基因傷缺陣，結果連輸六場，其實已經響起了一次警號。小牛實在太依賴呢支「德國槍」啦，當魯域斯基缺陣底下，成班波即刻冇晒重心，畢竟傑特及贊特拿等主力都非飆分能手，所以魯域斯基在下半季再有咩頭暈身嘅話，莫講話攞冠軍，連在季後賽過首圈都有難度。
再者，阿裕認為小牛現時實在太缺乏外投好手，泰利唔穩定、柏夫洛域又質素有限，唔可能打太長時間，所以當小牛要靠三分球追分嘅時候，往往都失手居多，唔似得塞爾特人及馬刺等有大把外投好手。