回顧2010年香港足壇，可謂先悲後喜，特別上半年更係噩耗頻傳，東亞盃大敗、港甲假波案加埋足總財困，東亞運奪金嘅Credit一鋪清袋，加上尹佬及黎祥兩位名宿離世更添傷感。可幸嘅係下半年喜事重重，亞運出線、港足落實改革、英超亞洲錦標賽重臨、畢特來港等，都令人睇到香港足球仲有希望！
愉園前國援于洋在本地聯賽意圖賄賂對方球員打假波，有人向廉署舉報，結果于洋被起訴定罪入獄及終身停賽，至於愉園亦戰績奇差，一代老牌球會要降班收場。
二月初日本舉行嘅東亞盃面對中日韓三強，港足三戰皆北狂輸十球，東亞運奪金嘅狂喜打回原形，球員賽前「血拚」行為更備受抨擊。
仲有係英超賽會於十月宣布明年亞洲錦標賽重臨香港，三支參賽英超球隊除維拉同布力般外，仲有Big4之一嘅班霸車路士。這項高水準賽事未上演先哄動，為未來一整年嘅足運提早注入強心針。
至於港甲聯賽亦有新衝擊，前曼聯名將畢特來港客串，在港甲射入一球，吸引八千多觀眾入場創近年新高，最終畢特更落實加盟南華，成為近十多年來來港搵食最高卡士嘅外援。
今年初足總財困問題表面化，過千萬儲備清倉，賀歲波亦要外判，足總高層仲要畀人批評帳目混亂理財不善，要勞煩主席梁孔德召開座談會向球迷公開交代。
香港足壇上半年冇錢又冇面之餘，更有「亞洲第一中鋒」尹志強與「青訓之父」黎新祥分別喺二月同六月先後病逝，令球圈瀰漫一片悲哀氣氛。
正所謂五窮六絕七翻身，香港足球下半年終於谷底反彈，最令人振奮嘅首推港足喺廣州亞運小組賽兩勝一和出線，超過半個世紀以來首次殺入淘汰賽階段，數百球迷北上聲援，激動人心。
另外在此段時間，足總亦落實聘請「改革顧問」，為香港足運研究及改革，成班顧問已經做緊嘢，希望出年有功課交到出嚟，為香港足壇未來發展作出長遠規劃。
撰文：波男