首輪2票出局 英格蘭冇朋友
【本報綜合報道】英格蘭雖然號稱擁有全球最好嘅球場及聯賽，可惜卻未能贏取國際足協委員嘅歡心，在前晚競逐二○一八世盃首輪投票，英格蘭僅獲兩票，率先被淘汰，其中一張得票係來自前英格蘭足總主席湯臣，另一票有傳係日本所投，亦有另一說係來自喀麥隆代表哈亞圖，呢名非洲足協會長正係早前被英國廣播公司（BBC）被踢爆有份收受賄款嘅主角之一。
譴責有人出爾反爾
對於今次結果，英國傳媒都深表震驚，《鏡報》以「英格蘭世上只有一個朋友」為題，並指出有部分委員出爾反爾，當中中北美洲主席兼國際足協副會長華拿被指曾親口向威廉王子承諾會投英格蘭一票，事實證明佢只係大話連篇。
英格蘭申辦團頭號人物安迪安臣事後憤怒地表示：「我不會公開任何名字，但好明顯有好多人把口都話會支持英格蘭，我哋原本認為可以取得六至八票，但事實卻係另一回事。」