上嚟採訪亞運足球賽多日，望住班「觀眾」，不禁令我諗起「職業粉絲」呢個詞彙，事關看台上有一大班「粉絲」，打正旗號自稱「志願助威團」，佢哋入場目的只有一個，就係專門幫啲冷門球隊打氣，增加場內氣氛。
「職業粉絲」喺香港已流行多年，係指一啲娛樂公司「硬銷」新人時嘅常用伎倆，佢哋暗地裏招募一百幾十個「僱傭兵」，假扮fans，被捧嘅新人每逢出騷，呢班「粉絲」就要「開工」為新人打氣。
早幾年「職業粉絲」最蓬勃時期，甚至有「價目表」，相信大家都約略聽過，大概係「尖叫100、流淚300、追車500、失禁1,000」等。
組委會宣稱，足球賽事門票基本上已經賣晒，但真正購票入場嘅觀眾只佔極少數，大部分觀眾都係組委會安排嘅「媒」，睇見佢哋都幾好笑，好似前日卡塔爾對印度，佢哋用中文幫卡塔爾叫完口號，轉頭又幫印度加油，又搖旗又玩人浪咁，不過肯定嘅係，對賽兩隊球員完全唔知佢哋搞乜，場面極度滑稽。