阿根廷出局 MVP無望
缺少真路比利之下，今屆阿根廷靠晒効力火箭嘅大前鋒史高拉，而佢亦交足功課，頭六場賽事平均攻入30分以上，只可惜球隊喺上場「南美打吡」中消耗太多能量，導致今回遇上平均年齡較細、大打體力化籃球嘅立陶宛即嚴重跌Watt，而史高拉亦僅得13分及4個籃板。
阿根廷失利後，亦代表其黃金一代亦係時候畫上句號。今屆阿根廷縱然缺少真路比利及盧茲安尼兩位老將，但平均年齡依然最高，陣中多達八個人屬「三字頭」，缺乏朝氣。呢支黃金一代曾於○四年勇奪奧運金牌，當時真路比利及奧拔圖等人正值黃金時期，但六年後已不復當年勇，歸隊亦難有作為，倒不如大刀闊斧重組，畀機會新人擔大旗。