中環耳目：朱漢輝推介翠華魚湯米線
鍾意買凍肉返屋企炮製嘅食家，一定對大昌行呢個招牌唔陌生。尋日卓妮見到大昌行集團副主席朱漢輝（Alex），佢事先張揚遲啲集團會開拓中高檔嘅食品市場，包括有靚紅酒即場畀人試飲。講開食經，Alex話佢自己就好鍾意翠華餐廳嘅魚湯米線，盛讚湯底好好味，再加幾粒招牌魚蛋，令人回味無窮。
Alex話，佢唔識翠華集團主席李遠康，自己純粹係普通食客。佢經常幫襯中環威靈頓街嘅分店，事關佢成日喺對面嘅鏞記食飯，有時想食啲香港地道美食，就會過對面嘅翠華餐廳滿足一番。佢嘅必食之選係魚湯米線，同埋香港好傳統、好出名嘅魚蛋。卓妮見佢講嘢個樣都幾回味無窮，睇嚟真係誠意推介。
其實「魚蛋稱霸，咖喱稱王」正係翠華嘅招牌口號。佢哋自製嘅魚湯非常受歡迎，除咗選用鮮魚熬製之外，仲加入咗鯊魚翅骨，所以特別鮮味。
