【本報綜合報道】世界籃球錦標賽今日上演兩場十六強賽事，頭場係斯洛文尼亞對澳洲，壓軸戰則由東道主土耳其對法國。土耳其喺分組賽表現出色，五戰五勝未逢敵手，面對缺少多名主將嘅法國，相信可順利殺入八強。
土耳其陣中有四名ＮＢＡ球員，當中包括効力太陽嘅頭號球星陶告魯，不過喺分組賽得分最多嘅球員，係効力公鹿嘅大前鋒伊耶蘇華，佢每場平均攻入16.5分，另外有９個籃板，係土耳其最有威脅嘅球員。
至於法國今次冇選柏加、諾亞等主將入伍，實力可謂大打折扣，分組賽表現一般，僅以三勝二負成績，小組第四名出線。法國最大問題係攻力不足，近三場分組賽得分都喺七十分或以下，今場面對擁有多個得分點嘅土耳其，形勢相當不利。
至於另一場斯洛文尼亞對澳洲，斯洛文尼亞喺分組賽發揮穩定，除不敵大熱門美國外，其餘四場分組賽贏晒，當中包括實力強勁嘅巴西，相信斯軍亦可順利進身八強。
周日11:00pm 斯洛文尼亞 Vs 澳洲
周一2:00am 土耳其 Vs 法國
註：中央5台直播