自從前英國網球名將漢文退休之後，所有球迷都將希望擺晒落梅萊身上。但希望愈大失望就愈大，踏入一○年梅萊可謂冇乜進步，一隻盃仔都贏唔到，對上一次捧盃已經喺去年十一月舉行嘅華倫西亞公開賽。
正當唔少人懷疑梅萊名大於實時，呢位廿三歲球手就即時向球迷作出回應！剛啱喺多倫多舉行嘅羅杰斯盃決賽，梅萊以７比５及７比５擊敗瑞士「球王」費達拿，成功衞冕冠軍。梅萊呢次奪冠都幾有說服力，手下敗將除咗費達拿之外，仲有拿度以及納班迪安，唔好忘記，今次教練哥列查並冇陪同梅萊一齊比賽，可見佢已經「大個仔」，唔使教練成日督促住佢。
梅萊賽後話依家信心爆棚，嚟緊仲會出戰辛辛那堤大師賽，希望以最佳狀態爭取美國公開賽寶座。