今屆總決賽由湖人同塞爾特人爭奪冠軍，堪稱係經典中嘅經典，兩隊鬥足六十年，雙方曾經喺決賽碰頭十一次，塞爾特人取得九勝二負嘅壓倒性佳績，當中出現過唔少經典場面，至今仍為球迷津津樂道。
兩隊嘅鬥爭大可分為三階段，首先係六十年代，由標羅素對張伯倫，當年塞爾特人喺標羅素帶領下，橫掃NBA球壇，喺五九至六六年連奪八屆冠軍，紀錄至今仍未有人可打破，而湖人則擁有韋斯及一場能夠獨取一百分嘅已故狂人張伯倫，黃綠兩軍嘅恩怨，就喺呢段期間開始。
八十年代NBA一度陷入低潮，但「魔術手」莊遜同「大鳥」布特嘅出現，令到NBA起死回生，兩隊曾經喺八四、八五及八七年三度碰頭，湖人除咗有莊遜壓陣外，仲有「天勾」渣巴，所以能夠喺三次總決賽贏咗兩次。
布特退役後，塞爾特人一直處於低潮，直至加納特加盟，配合雷阿倫、皮雅斯組成三巨頭，先再次帶領「綠軍」喺○八年擊敗湖人奪得冠軍，湖人多年來畀塞爾特人食住，故今次矢志報仇嘅決心甚強！
魔術手莊遜
位置︰控球後衞
奪冠次數︰５次
効力湖人年份︰79至91及96年
張伯倫
位置︰中鋒
奪冠次數︰２次
効力湖人年份︰68至73年
大鳥布特
位置︰小前鋒
奪冠次數︰３次
効力塞軍年份︰79至92年
標羅素
位置︰中鋒
奪冠次數︰11次
効力塞軍年份︰56至69年