日本fans撐到行
香港人睇欖球，慣性地諗起開Party勁歌熱舞，啤酒當水飲，仲有衣着性感出位嘅球迷，港隊打成點反而唔係咁關心。不過日本嘅欖球賽就係另一回事，日本球迷好嚴肅咁對待呢項運動，重視國家隊成績多於場外搞氣氛。日本欖球歷史悠久，日本欖協一九二六年已經成立，雖然唔及足球同棒球咁受歡迎，但擁有職業聯賽。而昨日比賽有七成入座率，場面熱鬧。
日本人睇波斯文，論現場氣氛就唔及香港國際七人欖球賽咁癲咁喪，但日本欖協仍非常落力宣傳球賽，包括在球場外粉飾一番，比賽當日又將球場停車場闢作跳蚤市場，售賣各式製作精美嘅紀念品，吸引唔少fans嚟消費，不過小記覺得最正嘅係嗰本製作精美嘅場刊，日本球員當然個個都資料詳盡啦，但連介紹香港隊嗰Part都一樣落足心機搵料，認真夠專業。