中國籃球巨星姚明榮升做爸爸，老婆葉莉昨日誕下一名七磅六安士嘅重磅女嬰。由於爸爸同媽媽都係絕世「高人」，有醫學專家根據遺傳學公式計算出，「姚千金」長大之後，身高有可能達到2.08米，骨骼精奇簡直係打籃球嘅好材料，可以繼承父母衣鉢。
葉莉喺美國休斯敦一間醫院順產之後，姚明立即透過社交網站發放喜訊，獲得大量球迷及網民祝賀，佢話：「我真係好興奮，今次係我哋夫婦生命中一段特別時刻，我哋非常感謝大家嘅支持同好意。」姚明同葉莉喺○七年八月結婚，並於今年一月傳出葉莉懷有身孕，但佢哋仍未為囡囡起名，似乎等緊球迷畀意見。
而另一NBA中國球員易建聯及姚明好友、香港藝人孫耀威先後在微博向姚明作出祝賀。
事實上，「姚千金」已成為球迷間熱烈討論話題，例如佢會唔會好似爸爸同媽媽一樣「高人一等」。有醫學專家指，姚明身高2.29米，葉莉身高1.9米，利用遺傳學公式計算，「姚千金」長大後，身高應會介乎1.945米至2.085米之間，可堪稱為超級高妹。因此，一般估計「姚千金」將來好可能成為籃球員。
另外，好多中國球迷關注「姚千金」到底會入中國籍，或係美國籍，由於呢個問題極度敏感，姚明都唔敢正面回答，佢只想女兒可以喺一個健康嘅環境長大。因此，火箭隊嘅擁躉認為姚明應會留隊，令囡囡可以過安穩生活。
本報綜合報道