ＮＢＡ明早上演三場季後賽，領先二比○嘅西岸「一哥」湖人將作客雷霆，湖人對上兩場都贏得相當驚險，加上今季作客成績只屬一般，對住如狼似虎嘅雷霆，輸番場一啲都唔奇。
（now 671周五早上９時30分直播）
湖人雖然以二比○領先，但兩仗分別贏八分及三分，形勢唔係一面倒。常規賽平均每場取得30.1分嘅雷霆「得分王」杜蘭特，踏入季後賽繼續保持水準，平均取得28分，相信今次返到自己地頭發揮會更佳。
睇番湖人今季作客勝率都係得五成六，今季唯一一次作客俄克拉何馬，湖人都係輸波而回，該仗高比仔遊魂球場僅得十一分，何況依家湖人領先兩場難免會鬆懈，隨時畀雷霆有機可乘。
另一場拓荒者對太陽亦相當緊湊，兩隊目前打成一比一，太陽排名雖然較高，但去到季後賽經常腳軟，佔主場之利嘅拓荒者今場可看高一線，而且對賽往績方面，拓荒者亦有優勢，近三次主場都贏太陽，只要主將安祖米拿有番手感，今仗可再下一城。