大帝40分騎士再劏牛
「大帝」太強了！常規賽盟主騎士尋日再喺主場出戰公牛。雖然客隊受過首場教訓後，今回表現已有進步，可惜公牛就算合五人之力，依然頂唔住大勇嘅「大帝」勒邦占士。「大帝」今場表演個人騷，豪取40分，協助騎士贏112比102，取得２比０領先優勢。
正選陣容平均年齡唔夠25歲嘅公牛，經過首戰大敗後，今場明顯吸取教訓，打得非常集中，三節過後不落下風，與騎士打成77平手。可惜公牛今場卻犯一大毛病，就係讓勒邦占士太多空位跳投，「大帝」單係第四節已攻入15分，一下子將分差拉開，結果騎士就係憑占士末節大爆發，以112比102取得季後賽第二場勝仗。
勒邦占士今場無人能阻，23次起手入16球，６次罰球全中合共攻入40分，另外亦貢獻８個籃板球、８次助攻及２次封阻，在奧尼爾及莫威廉士同時失準下，「大帝」再次憑一人之力拯救球隊。
出名孩子氣嘅占士，賽後都忍唔住諷刺對手：「佢哋話我唔識遠射，一直唔貼身防守，既然係咁我就射畀你睇，結果一次又一次、一次又一次咁命中！」
爵士險勝追平金塊
至於昨天另一場賽事，飽受傷兵困擾嘅爵士憑迪倫威廉士貢獻33分及14次助攻，作客以114比111險勝金塊，總成績追回１比１。
本報綜合報道