加納特批肘火爆
邊個敢話KG加納特冇晒火？今季NBA季後賽果然夠激，首日賽事就出現「講手大混戰」！三十三歲嘅「綠衫軍」領袖加納特，因不滿熱火前鋒昆田李察遜出言侮辱，一個批肘還以顏色，兩隊球員見狀即互相推撞，幸好冇人再動粗，避免釀成大毆鬥。事後球證將加納特驅逐離場，聯盟對今次事件亦有可能追加罰則，唯一好彩係塞爾特人今場反勝熱火85比76。
今次混戰發生喺賽事最後40秒，事緣皮雅斯帶球推進時受熱火兩將夾擊，皮雅斯欲擺脫對手時弄傷肩膀，痛苦地瞓喺熱火後備席前。此時加納特上前了解隊友傷勢，誰不知昆田李察遜竟然走向加納特面前出言不善，估計係話皮雅斯詐傷，KG即時無名火起互相對罵。
聯盟追罰隨時坐波監
原本想嚟勸交嘅格連戴維斯、夏士林及謝美奧尼爾及後都推撞起嚟，KG喺混亂間更用肘頭批中昆田李察遜面部，結果KG被球證直接趕離場，而昆田李察遜、格連戴維斯及夏士林則各食一個技術性犯規。
不過KG賽後卻否認有意批肘：「當時我不斷被人推撞，根本唔清楚後面有乜人。成件事我都只係擔心皮雅斯嘅傷勢，而且我認為昆田李察遜嘅行為極不尊重人。」由於加納特的確有批肘，所以聯盟有可能追加罰則，第二戰隨時要坐波監。
講番場波，塞爾特人今場全靠尾段防守穩健，令得熱火在最後一節僅得10分，最終贏85比76在東岸首圈打響頭炮。焦點人物加納特打得最好，攻入15分，兼且有9個籃板球及2次搶截，另皮雅斯亦貢獻16分。至於熱火主腦韋迪就射入全場最高26分及拉下8個籃板球，可惜仍未能助球隊贏波，第二戰將於香港時間周三早上舉行。
本報綜合報道