騎士橫行再劏死牛

「大帝」占士休戰四場後回歸賽場，而老將奧尼爾亦養傷兩月後復出，結果兩人尋日只係出咗半成功力，就輕鬆協助騎士擊敗公牛。其中占士除貢獻24分、６次助攻及５個籃板球外，今場更充當防守大師４次封阻對手，抖足精神果然唔同啲！至於奧尼爾亦弗爆回歸，僅上陣25分鐘就攞咗12分、５個籃板球、４次助攻及３次封阻，表現全面同屬贏波功臣。

戴歷羅斯孤掌難鳴

今場戰情可謂一面倒，騎士首節已經拉開14分差距，由頭帶到尾贏波。公牛面對齊章嘅騎士，就好比細路哥對成年人，明顯唔夠班。騎士今季最犀利之處係多位球員都具得分能力，毋須打殘占士一個，其中占美臣內外兼備，而莫威廉士就三分準繩，再配合一條星級後備陣容。可憐公牛單靠戴歷羅斯一個邊有得砌㗎！相信第二回合都係騎士嘅天下。