騎士勢拔頭籌

NBA季後賽周日凌晨開打,聯盟一哥騎士打頭陣,東岸首圈主場迎戰趕上尾班車嘅公牛。因騎士在東岸大超班,早早鎖定常規賽冠軍後,季尾賽事都讓「大帝」勒邦占士及莫威廉士等主力休息,好讓佢哋以最佳狀態迎戰季後賽。相反公牛為爭取最後一張季後賽入場券,要搏到最後一輪,球員身心俱疲,此消彼長下,估計騎士在七場四勝制首仗可先拔頭籌!(周日凌晨3時開賽)

相信球迷都會記憶猶新,騎士上季同樣以大熱姿態挑戰NBA總冠軍,可惜季後賽連續兩圈橫掃對手後,在東岸決賽竟然大熱倒灶,遭魔術淘汰,原來此事仍令「大帝」耿耿於懷:「我畀呢件事傷害多時,但現時我非常期待季後賽嘅來臨,我要將一年來嘅悶氣發洩出來。」

奧尼爾傷愈及時而出

事實上,騎士經過上季教訓,已經成熟不少,教練米克布朗喺常規賽尾亦不讓勒邦占士爭神射手寶座,要佢避戰爭取更多休息時間。除占士外,老將奧尼爾經過八星期養傷,亦鐵定可於今場復出,佢賽前表示:「為咗迎接季後賽,呢段時間我不斷操弗自己,頻頻上健身中心及游泳池,另外亦服用健康餐單,希望以最佳狀態回歸賽場。」

相比騎士,公牛季尾明顯較為忙碌,球隊要搏到最後一場先確保季後賽入場券,一班球員難免有啲殘。唯一能增強球員信心,係公牛今季四戰騎士不落下風,獲得兩勝兩負嘅成績,可惜騎士係今季主場成績最佳嘅球隊,相信公牛都難於作客偷雞。

勒邦占士

年齡:25歲

位置:小前鋒

所屬球會:騎士

年薪:1,578萬美元

戴歷羅斯

年齡:21歲

位置:控球後衞

所屬球會:公牛

年薪:518萬美元

諾亞

年齡:25歲

位置:中鋒

所屬球會:公牛

年薪:246萬美元

本報綜合報道