NIKE1.5億年薪綁大帝
騎士昨日輕輕鬆鬆，就以一○四比七十九於主場大炒活塞，由於分數早已拉開，「大帝」勒邦占士出手唔多，只係攞咗十五分，取得七連勝，繼續向常規賽冠軍邁進。另外克利夫蘭傳媒報道，勒邦占士將與NIKE續約，新合約金額未有透露，但估計每年達二千萬美元（約1.5億港元）。
勒邦占士○三年與NIKE簽約七年，該份合約達一億美元，當中包括九千萬美元收入及一千萬美元額外花紅，事隔七年，勒邦占士嘅身價已不可同日而語，市場估計，新合約金額每年起碼有二千萬美元。
轉「冧巴」露玄機
勒邦占士係目前NBA商業價值最高嘅球星之一，除咗NIKE之外，仲係可口可樂、麥當勞等大品牌嘅代言人，據《福布斯》估計，勒邦占士現時每年嘅收入及贊助費超過四千萬美元，而大帝下屆球衣號碼由23號改為6號，其實亦係為咗配合NIKE嘅新宣傳攻勢，據悉NIKE會為勒邦占士度身訂造一個新Logo，類似當年行銷「波神」米高佐敦嘅Air Jordan品牌一樣。
此外，有報道指NIKE嘅新合約有附加條款，如果「大帝」未來加盟紐約、芝加哥或洛杉磯等大城市嘅球隊，每年可額外獲得五百萬美元嘅收入，呢項條款無疑增加占士過檔嘅機會。
本報綜合報道