本文重點
聽朝NBA上演西岸大戰，湖人將於主場迎戰馬刺，「紫金領袖」高比拜仁因為足踝傷患，尋日已經缺席咗對拓荒者嘅比賽。據當地傳媒消息指，高比仔將會因傷休息十日，因此明日一戰好大機會成為座上客，客隊馬刺有機可乘！
（廣東體育及中央5台周二早上11時30分直播）
高比拜仁於早前對灰熊嘅賽事中弄傷足踝，雖然及後對金塊仍然「頂硬上」負傷上陣，但尋日對拓荒者終於唔掂要「請病假」，成為鐵人自○六年十二月後，連續打二百卅五場比賽後首次因為傷病缺席賽事。
抖10日明星賽復出
事實上高比仔的確周身傷，除足踝外手指亦一直有問題，所以美國傳媒估計佢會休息十日，等待喺明星賽復出。
缺少高比仔嘅湖人，實力無疑會大幅削弱，主場碰上強敵馬刺，確實難言穩勝。再者馬刺上月曾大炒湖人二十分，而球隊領袖柏加亦已擺脫傷患復出，並於尋日協助球隊大數快艇，因此馬刺今場有得受讓之下，絕對值得捧場。