夜場發生好多奇怪事，而呢一類事件通常只有行內人至知，就好似客人經常玩到樂極忘形，身上財物就咁唔見咗。大家都覺得萬一發生咁既情況，最大嫌疑嘅就係小姐，無論件事係點都好，總之客人一定會搵小姐出氣。根據夜場負責人講，客人最多唔見嘅係電話，反而銀包就收得好密實，因為電話經常都係揸喺手，或者放喺枱面，飲飲吓就唔記得放喺邊。其實有九成客人嘅電話都會搵得番，因為佢哋大多留喺廁所，或者係跌咗落地，但係當搵唔到嘅時候，就梗係搵小姐嚟出氣。
夜場有見及此，近日特別為小姐身上掛個手機袋，睇落十分有趣，間場話如果客人願意嘅話，可以將電話放入小姐個手機袋，由佢代為保管。其實刮王就有多少唔明，總之電話唔過手，咁責任一定喺客人身上，依家個電話由小姐保管，萬一真係唔見咗咪又係要賠？大家估吓夜場有咩睇法？佢話原來落嚟玩嘅客人如果唔見咗個電話，多數會怪罪於身邊人，但係見到小姐袋住個電話，就算真係唔見咗，佢哋覺得只係小姐唔小心，最多都係罰小姐陪玩。聽落呢件事唔係好合邏輯，但事實上客人又好願意將部手機交由小姐保管，認真奇怪。
撰文：刮王