上季差少少就能打入季後賽嘅山貓，今季重整旗鼓換入贊特拿及史堤芬積遜等球員後，成績繼續躍進，半季過後獲得24勝23負，排東岸第六位，大有機會歷史性打入季後賽。

買家唔鍾意米高佐敦

雖然成績上揚，但似乎仍未改變到山貓最大股東羅拔莊遜嘅賣盤意向，基於呢位班主自○三年入主後，一直無法尋找足夠贊助商，而球票銷售亦欠理想，所以早喺去年初已屢傳佢打算放盤。股東之一兼籃球事務總監米高佐敦就曾表明有意全面收購，但最後冇下文，而另一個競爭者，就係前火箭主席普斯圖魯斯，但去年夏天收購就失敗。

普斯圖魯斯日前再向羅拔莊遜出價，據悉今次成事機會相當高，山貓有機會在三月易手。因為普斯圖魯斯向來有管理球隊經驗，而佢亦對米高佐敦嘅管理「功力」冇乜好感，所以有指佢成功收購山貓後，就會踢走晒「波神」及其他管理層，重新組織內閣。