政情：搞反修例展覽遭拒批場地 區議員擬向民政處索償
有觀塘區議員早前擬租用社區中心舉辦反修例風波相關嘅展覽，但觀塘民政事務處就話宣傳訊息同申請場地時「促進社區和諧」嘅表述不符，拒批租用場地。觀塘區議員龔振祺批評民政處打壓，仲考慮就事件提出索償，但同時有建制派區議員認為唔存在打壓，仲形容民政處係「最後嘅把關者」。
被指申請表述與宣傳不符
龔振祺話本身民政處冇反對展覽，但突然收到民政處職員來電稱拒絕批出場地，佢估計同社交平台發放嘅宣傳訊息有關，而事後致電民政處仲不獲回覆添。佢批評民政處打壓、孤立區議會，仲形容係「白色恐怖」，考慮緊從小額錢債審裁處向民政處追討賠償，仲打算喺下次區議會大會中提出討論本次事件。
同為觀塘區議員嘅柯創盛就話，向民政處申請活動場所都需遵從特定指引，如果宣傳訊息同申請場地時嘅表述不一，民政處撤回場地申請係無可厚非。對於龔振祺揚言要喺大會上質問民政處職員，柯話尊重所有區議員嘅提案，但希望區議員花多啲時間改善地區民生囉。