雖然整體表現麻麻，但最後一擊命中就乜都贏番晒啦！塞爾特人巨星加納特尋日作客麥迪遜公園大失水準，投射命中率連三成都冇，但佢勝在經驗老到，加時射入絕殺一擊協助塞爾特人以107比105擊敗紐約人，由罪人變英雄。

塞爾特人上場於東岸大戰中輸畀魔術，本以為面對弱旅紐約人可以輕鬆贏番場挽回面子，點知原來冇骨魚腩都唔易食。「綠衫軍」今場戰至第四節仍然處於落後劣勢，要去到剩餘三分鐘時先追平並一度反先，只可惜朗度最後一擊唔入，兩軍要進入加時作賽。

紐約人加時繼續咬住對手唔放，最後九秒時大衞李爾更射入一記兩分波追平，本以為賽事要再加時之際，加納特挺身而出接應皮雅斯傳送射入絕殺一擊，以107比105險勝，成功為球隊止跌回升。

罪人變英雄

今場加納特十五射僅四中，全場僅得十分及七個籃板，表現並唔理想，但因為射入絕殺球，已令佢由罪人變英雄，佢賽後表示：「今日皮雅斯發揮理想，所以我知道紐約人一定會派專人凍結佢，因此我估計皮雅斯會傳給我作最後一擊。」而全場獲得卅三分嘅皮雅斯亦表示：「加納特今日確實有所失準，但只要我哋需要佢嘅時候，佢就會達成任務。」塞爾特人贏波後總成績十勝四負，在東岸仍落後於鷹隊及魔術。

本報綜合報道