香港東亞運，共動用廿一個場地舉行廿二個比賽項目，除紅館、伊館同大球場外，仲有好多平時市民用開嘅體育設施、新建場地、私人場地，同埋公路、沙灘及維港（開幕禮）等，極有本土特色。
專為今次盛事而新建嘅場地有兩個，分別係將軍澳運動場及香港賽馬會國際小輪車場，分別舉行田徑及小輪車賽事，前者耗資近四億元興建，後者亦花費二千二百萬，係為今次賽事投放最多資源嘅項目。
不過將軍澳運動場只得一邊有蓋看台，且五千座位比起四年前澳門嘅主場仲小呢！另一新場國際小輪車場位於葵涌醉酒灣，最多可容納二千人，東亞運首面金牌可能在此誕生。此外大多數場地都做咗翻新工程，其中九龍公園泳池、紅館同伊館，裝修費全部都花費過億。
