政情：郭榮鏗怕佔得太前

民意明顯 公文袋受衝擊

法治係香港核心價值之一，雖然由持續近兩個月嘅佔領行動以爭取真普選為目標，但到頭來被人連番炮轟破壞法治，其中一向以維護法治、爭取民主為招牌嘅公民黨（公文袋）更係首當其衝，而被視為泛民大本營嘅法律界亦岌岌可危，甚至有「變天」嘅可能。

綜合各方消息指，公文袋嘅主張原本喺業界同青年一輩好有吸引力，但經歷今次佔領行動後，原來以公民抗命方式爭取民主，或可能犧牲法治，因此Dennis身為業界代表，一直身體力行唔敢同歪理連篇嘅泛民法律界中人「跟車太貼」，一來於佔領區出現都係以法律代表名義現身，二來好少現身佔領記者會，似乎做好晒劃清界線嘅準備。

法治取向 反映業界生態

有法律界元老認為，Dennis對於法治嘅取態，更折射出法律界嘅生態。首先律師會前會長林新強早前因發表撐「一國兩制」白皮書言論被「倒林」陣營罷免，分析指如果此事喺依家先至出現，預料將難以炒作。事關聞說有泛民、公文袋嘅支持者經過今次佔領行動後，講到法治基石時有反思醒覺，知道孰輕孰重。

再進一步來講，九七回歸後法律界議席係泛民天下，主因適逢法律界開放，律師數目大增，由原本二、三千人增加至六、七千人，加上新增者大多較為年輕，取態自然較傾向泛民。不過，隨着時間流逝，呢批年輕律師入行十幾年後都開始變得成熟同多角度思考問題，料泛民同建制喺法律界嘅比率，由過往七三比，降至約為六四比，話建制派無心派人參選向Dennis「挑機」，講都無人信啦！